"Keçən ay İspaniyada "Atletiko Bilbao" və "Real Sosyedad" klublarında təcrübə keçmək və daha sonra VİP lojada "Atletiko Madrid" - "Yuventus" oyununa baxmaq təklifi aldım. Təklifi böyük məmnuniyyətlə qəbul etdim və səfərə yollandım".
Bu sözləri Sport7.az-a Azərbaycan Respublikasının əməkdar məşqçisi, UEFA-nın A lisenziyalı məşqçisi Zamin Əsədullayev İspaniya səfəri ilə bağlı danışarkən bildirib.
Təcrübəli mütəxəssis səfərdə nələr baş verdiyini saytımıza danışıb:
"Sentyabrın 17-də "Atletiko Bilbao"nun bazasında yollandıq. Burada klubun idman direktoru Rafael Alkorta Martinez ilə görüşümüz oldu. Söhbət əsnasında Martinez gələcəkdə də mütəmadi olaraq kluba gəlib, akademiyanın iş planından, təcrübələrindən yararlana biləcəyimi dedi.
Daha sonra "Real Sosyedad"ın akademiyasına getdik. Orada tanınmış futbolçu, məşqçiliyə yeni başlayan Xabio Alonso ilə tanış olduq. "Real"ın U-14 komandasını çalışdırırdi, indi B komandasına baxır. Maraqlı görüş oldu, klubun bazasını gəzdik, iş sistemi ilə tanış olduq.
Ertəsi gün isə San-Sebastiyandan Madridə Çempionlar Liqasının qrup mərhələsində keçirilən "Atletiko Madrid" - "Yuventus" matçını izləmək üçün getdik. Oyundan sonrası gün "Real Madrid"in stadionu "Santyaqo Berbaneu"da ekskursiyamız oldu. Səfərin sonunda Frankfurtda 2 gün istirahət etib, qayıtdım Bakıya".
Gələcək planlarından danışan Zamin Əsədullayev uşaq futbolu ilə vidalaşıb, böyük futbolda çalışmaq istədiyini qeyd edib:
"İran proqramımı bu ilin sonunda yekunlaşdırmaq istəyirəm. Burada çətindir. Azərbaycandan hələki mənə uyğun təklif yoxdur. Akademiyalarda müəyən yaş qryuplarında çalışmaq üçün təklif var, ancaq o da məni qane etmir. Uşaq futbolunda işimi yekunlaşdırıb, böyük futbolda çalışmaq istəyirəm.
Ancaq onu da qeyd edim ki, əvvəlki illərə nisbətən Premyer Liqanın səviyyəsi çox aşağıdır. Klubların inkişaf üçün bir-birilə rəqabəti yoxdur. "Qarabağ"ın baş məşqçisi Qurban Qurbanova milli qəhrəman adı vermək lazımdır ki, bu cür səviyyəsi aşağı olan çempionatdan "Qarabağ"ı Avropa Liqasının qrup mərhələsinə çıxarır".
Röya Kərimli
Sport7.az
Комментарии
Отправить комментарий