Futbol mütəxəssisi Adil Şükürovun Sport7.az saytına müsahibəsi...
- Millimiz Avro-2020-ninseçmə qrup mərhələsində cəmi 1 xal yığmaqla 24 il əvvəlki antirekordu təkrarladı. Sizcə, belə zəif çıxışa səbəb nə oldu?
- Biz komandamızın 1 xal toplamasını 24 il əvvəlki nəticəylə eyni tuturuq. Amma gəlin hazırda futbol və futbolçular üçün yaradılan şəraitə baxaq. Həqiqətən, indi yaradılan şərait və imkanlar qarşılığında toplanan 1 xal çox bərbad bir nəticədir. Amma biz tənqidlərdən çox, futbolun bu vəziyyətdən çıxarılması üçün yollar axtarmalıyıq. Bunun üçün də mütəxəssislər hamısı bir araya gəlib ümumi bir iş strategiyası qurmalı və federasiya tərəfindən icra edilməlidi.
- Uğursuzluqda ən böyük günahkar kimdir? Klublar, AFFA, futbolçular və ya Yurçeviç?
- Bu uğursuzluqda hamı - klublar, AFFA, futbolçular, həm də baş məşqçi pay sahibidi. Klubları nəyə görə deyirəm? Çünki milli komandada oynayan futbolçuların hər biri klublardan gəlir və onların sərgilədiyi futbol klublarda keçirilən hazırlığın bəhrəsidi ki, yekunda millidə özünü göstərdi. Bu, artıq istəsək də, istəməsək də danılmaz faktdır. AFFA klubların akademiyalarına verilən pulların necə xərcləndiyini nəzarətdə saxlamalıdı. Ki, bu pullar necə, kimlərə, hara sərf olunur. Aydın məsələdir ki, akademiyaların qurulmasında, idarəçiliyində düzgün mövqe tutulmalı, planlar hazırlanmalıdı. O ki qaldı, baş məşqçiyə, Yurçeviçin atdığı addımlarda mənə qaranlıq qalan məqamlar oldu. Məsələn, heyətdə rotasiyalar gözlənildiyi oyunlarda , o, bunu etmədi. Üç gündən bir eyni heyəti meydana buraxırdı. Təəssüflər olsun ki, bizim futbolçularımız buna tam olaraq hazır deyillər.
- Böyük ehtimalla Yurçeviç göndəriləcək. Yenə əcnəbi məşqçi ya yerli mütəxəssis?
- İstəyir Yurçeviç göndərilsin, istəyirsə də yerli məşqçi olsun və yaxud hansısa yeni əcnəbi məşqçi gəlsin vəziyyət dəyişməyəcək. Biz futbolçuların hazırlıq səviyyəsini yüksəltməliyik. Ondan sonra hansısa nəticədən və ya uğurdan danışa bilərik. Futbolçuların hazırlıq səviyyəsi indiki kimi qalarsa, yeni gələn baş məşqçi lap deyək ki, 5 xal toplayacaq. Bunu biz uğur sayacağıq?
- Maraqlıdır ki, digər millilərimiz də bərbad nəticələrlə yadda qalır. Deyəsən, bəla bir yerdən qaynaqlanır...
- Əvvəl də dediyim kimi, həqiqətən AFFA-nın üzərinə bu işdə çox böyük məsuliyyət düşür. Çünki AFFA klubların akademiyalarında gedən prosesləri sıx izləməlidir. Əsas və vacib olan məsələ futbolçu amilidir ki, bu da akademiyaların işidir. Baxaq, hansı klublarımızın akademiyalarından milli komandalarımıza hazır futbolçular gəlir? Milli komanda futbolçu hazırlamır, inkişaf etdirir. Nə qədər ki, akademiyalardan millilərə gələn futbolçular milli səviyyəsində hazır olmayacaqlar, millilərin hər hansı bir uğur barəsində danışmağı kənara qoymalı olacağıq.
- 2 tur sonra Premyer Liqada qış fasiləsinə yollanacaq…
- 1-ci dövrədən sonra "Qarabağ"ın vaxtından xeyli əvvəl çempion olacağı görünürdüsə, indi vəziyyət tamam fərqlidir. "Qarabağ"ın 5 oyunda cəmi 6 xal toplaması 2-ci pillənin sahibi ilə xal fərqinin 6-a enməsinə səbəb oldu. Çempionluğu hədəfləyən "Neftçi"nin qış fasiləsindən sonra heyəti gücləndirməklə bu fərqi aradan qaldırması mümkündü. Bu üzdən çempionluq uğrunda maraqlı mübarizənin son turlara qədər gedəcəyini demək olar. Eyni sözlər Avroliqada çıxışı hədəfləyən klublara da aiddi. Preymer Liqa iştirakçılarına nəzər salsaq, "Qarabağ" və "Neftçi" xaric digər 6 komanda heyət və güc baxımından aşağı-yuxarı eynidilər. Autsayder "Qəbələ"ni 4-cü yerdəki "Sumqayıt"dan 8 xal ayırır. Bu fərqi 3 xallıq sistemlə aradan qaldırmaq elədə əlçatmaz deyil. Kimin çempion olacağı, kimin Avroliqaya vəsiqə qazanacağı qış fasiləsində edilən transferlərdən və hazırlıqdan asılı olacaq. Fikrimcə, indiki durumda nəyinsə proqnozunu vermək düzgün olmaz.
- Əvvəlki müsahibələrinizin birində "Qarabağ"ın qrup mərhələsindən çıxacağını demişdiniz. Amma indi komandamızın növbəti mərhələyə yüksəlməsi öz əlində deyil.
- Son oyunlara fikir versək, istər daxili çempionatda, istərsə də Avroliqanın qrupunda "Qarabağ"ın oyununda düşüş görünür. "Qarabağ" dominant futbol oynamağı xoşlayan komandadır. Əsas da Premyer Liqada. Rəqiblərinin nisbətən zəif olması komandanı istər-istəməz hücuma daha çox fikir verməyə məcbur edir ki, "Qarabağ" bu zaman rəqib müdafiəsini yarmaq üçün daha geniş oynayır. Belə olan halda müdafiə xəttində boşluqlar daha çox olur və top itkisi baş verdikdə rəqibin əks-hücumları zamanı vaxtında qapana bilməməsi qolla nəticələnir. Fikir versək, "Sevilya" ilə Bakıda buraxılan 2-ci qol, "Zirə" və "Sumqayıt"la oyunlardakı qollar… Hamısı bir-birinə bənzəyir. Buna baxmayaraq, fikrimdə qalıram. "Qarabağ"ın qrupda 2-ci olacağına inanıram. Bunun üçün səfərdə "Sevilya"dan xal almaq mütləqdir. Necəki bunu əvvəlki illərdə heçdə "Sevilya"dan zəif olmayan "Atletiko»dan almışdı. Məncə, "Qarabağ" bunu bacaracaq. "Düdelanj" ilə ev oyununda isə qalib gəlməyə borcluyuq.
- Vaxtilə baş məşqçisi olduğunuz və gümüş medallar qazandırdığınız "Zirə"də maliyyə vəziyyəti ürəkaçan deyil. O cümlədən, "Qəbələ" və "Səbail"də. Bu gediş futbolumuzu hara aparır?
- Maliyyə məsələləri klubların inkişafında çox böyük rol oynayır. Klublarda büdcənin düzgün idarə olunması çox vacibdir. Artıq, ilin əvvəlindən hər bir klubun büdcəsi müəyyən edilir və buna uyğun da komanda qurulur. Bizim "Zirə"ylə gümüş medallar qazandığımız mövsümdə büdcəmiz digər klublara ayrılan maliyyədən həqiqətən də iki dəfə az idi. Düzgün idarəçiliklə bu uğura nail ola bildik. Maliyyəni düzgün yönəltmək çox vacibdir. Təbii ki, maliyyə təyinatı üzrə düzgün xərclənmədikdə, israfçılıq olduqda bu, nəticəyə də təsir edir, klubun ümumi vəziyyətinə də. Fikrimcə, vəziyyət faciəvi deyil. Həm də nəzərə alaq ki, növbəti mövsüm Premyer Liqada komanda sayı artmalıdı. Tək bu amil futbolumuzun durğunluqdan çıxmasına böyük təsir göstərəcək.
- Yarım ilə yaxındır ki, işsizsiniz. Təkliflər olub, yoxsa yaddan çıxmısız?
- Xeyr, təklif olmayıb. Heç bir klubla da yaxından danışıqlarımız olmayıb.
- Maraqlıdır, işsiz qalan Adil Şükürov boş vaxtlarında nə işlə məşğul olur?
- Premyer Liqa, 1-ci Divizion oyunlarını izləyirəm. İmkan düşdükcə, aşağı yaşlı futbolçuların iştirakı ilə keçirilən liqalar haqqında da məlumat toplayıram. 3 ilə yaxın uşaq futbolunda oldum, "Zirə"nin Akademiyasına rəhbərlik etdim. Orada qurduğumuz işin bəhrə verdiyini görəndə sevinirəm. Uşaqlar yavaş-yavaş böyüyürlər, onları yaddan çıxarmaq olmaz. Bilirsiniz, bəzən işsiz qalmağın da faydası var. Bir məşqçi olaraq əvvəl atdığımız addımları, futbola yanaşmalarımızda olan səhvləri görək, analiz edək və özümüz üçün yeni bir nəticə çıxaraq. Eyni zamanda da oyun üslubumuzda olan dəyişiklikləri nəzərə alırıq, işlərimizi görürük. Bunlar hamısı gələcək üçün çox vacibdir. Özümüzü inkişaf etdirməliyik, çatışmazlıqlarımızı görərək onları aradan qaldırmalıyıq.
Röya Kərimli
Sport7.az
Комментарии
Отправить комментарий