Bir müddət öncə Sport7.az saytında Premyer Liqa klublarının aşağı yaş qruplarından fərqli yaş qrupları üzrə milli komandalarımıza neçə futbolçu dəvət olunması ilə bağlı araşdırma dərc etmişdik.
Araşdırmanın yekununda məlum olmuşdu ki, əsas millinin futbolçuları xaric, digər yaş qruplarından olan yığmalarımıza "Qəbələ" - 16, "Qarabağ" - 15, "Neftçi" - 13, "Sabah" - 10, "Keşlə" - 8, "Sumqayıt" - 6, "Zirə" - 6, "Səbail" - 5 futbolçu göndərir.
Bəs görəsən bu siyahıda yer alan gənc, yeniyetmə futbolçular millinin baş məşqçiləri ilə yanaşı şərəfini qoruduqları klubların baş məşqçisinin diqqətini də çəkə biliblərmi? Azərbaycan futbolunda yeni ulduzların doğacağı gözlənilirmi?
Sport7.az-ın bu sualını Premyer Liqa klublarının baş məşqçiləri özləri cavabladı.
Aftandil Hacıyev ("Səbail"): "Bildiyiniz kimi, "Səbail" 3 ilin komandasıdır, tarixi çox olan bir klub deyil. Ancaq akademiyada artıq müəyyən işlərə start verilib. İşin daha səmərəli getməsi üçün akademiyamıza Niderlanddan koordinator cəlb etmişik. Hazırda akademiyanın daha çox yuxarı yaş qruplarını, yəni 15, 16, 17, 19 yaşlı futbolçuları izləməyə vaxt tapa bilirəm. Kimsə "ulduz" olacaq demək çətindir. Ümumiyyətlə, belə bir fikri səsləndirmək mənimçün məsuliyyətdir. Çünki bu yaş qruplarında tez-tez futbolçular dəyişirlər. Məsələn, bu gün 15-16 yaşında fərqlənən uşaq ola bilsin 18-19 yaşında artıq inkişaf etməsin. Və ya əksinə... Sadəcə olaraq, kompleksli şəkildə diqqət ayırmaq, kollektiv oyunda hər bir uşağa fikir vermək lazımdır. Bizdə də elə uşaqlar var ki, gələcəkdə adlı-sanlı futbolçu ola bilərlər".
Zaur Həşimov ("Zirə"): "Ulduz" ifadəsi ümumiyyətlə Azərbaycan futbolçularına xas deyil. Müəyyən ölkələr var ki, ordan belə futbolçular həqiqətən çıxa bilər. Bizim futbolçular hansısa səviyyəyə qədər gəlib çıxa bilirlər. Bizim komanda da Premyer Liqada yaxşı səviyyədə oynaya biləcək oyunçularımız var. Məsələn, aşağı yaş qruplarında Vüsal, Camal, Raul adlı oyunçularımız var ki, heyətə cəlb eləmişdik. Hətta Raulu 19 yaşlılardan ibarət milliyə çağırdılar. Camal əvəzedici heyətdədir, ancaq U-17-də də oynaya bilər. Çünki 2003-cü il təvəllüdlüdür. Yəni, bizim komandada belə uşaqlar var. Ancaq 13-14 yaşlı uşaqları komandaya cəlb etmək hardasa düzgün olmaz. Belə gəlib məşqləri izləyə bilər, amma çıxıb komanda ilə məşqlərə qatılması yaxşı olmaz. Əksinə, o uşağı biz "sındıra" bilərik".
Ayxan Abbasov ("Sumqayıt"): "Bu, əla mövzudur. Bütün klublar, bütün məşqçilər gənc futbolçulara dəstək olmalıdır. Çünki bir çox komandalarımız nəticəyə oynayır deyə, bu məsələ ikinci planda qalır. Sırf bizim komandanı götürsək, bu gün "Sumqayıt"dan bir çox gənc fubtolçunun həm bizimlə məşq etməsinə, təlim məşq toplanışına getməsinə, həm də çempionatda onlara şans verməyə üstünlük veririk. Digər tərəfdən akademiyanın məşqçiləri ilə, koordinatorları ilə həmişə söhbət edirik. 16-17 yaşlılardan ibarət çempionatda yaxşı təsir bağışlayan uşaqları məşqçilərinin məsləhəti ilə millinin oyununa görə fasilə yaranan vaxtlarda məşqlərimizə cəlb edirik. Bu da futbolçu üçün motivasiya, əsas komandanın təcrübəli futbolçuları ilə məşqə çıxmaq böyük stimul yaradır. Belə olan halda futbolçular daha yaxşı yetişir. Daha sonra biz onları əvəzedici heyətimizə cəlb edirik. Məsələn, Nəbi adlı bir futbolçumuz var. 1999-2000-ci il təvəllüdlülərdən ibarət qrupda çıxış edir. Onu qeyd etmək istərdim. Yavaş-yavaş şans veririk. Bu da gələcəkdə bu futbolçuların uğur qazanması üçün vacib addımdır".
"Sabah"ın baş məşqçisi Jelko Sopiç ilə klubun mətbuat katibi Elnur Həmidovun vasitəsi ilə əlaqə yaratdıq. Mövzumuza Sopiçlə yanaşı Elnur bəy də öz fikirlərini bildirdi:
Elnur Həmidov: "Çox gözəl mövzudur. Əslində buna elə mən özüm də cavab verə bilərəm. Jelko Sopiç "Sabah"da çalışmağa başladığı ilk günlərdən aşağı yaş qrupları ilə yaxından maraqlanıb. Yəqin bilirsiz, bizdə akademiyamızın koordinatoru Adino Mustedanaqiç də Xorvatiyadandır. O da Sopiç kimi Zaqreb "Dinamo"sunda çalışıb. O ki qaldı Sopiçin U-17, U-19 və əvəzedici komandalarımızda oynayan futbolçularla maraqlanmasına, bəli, mütəxəssis U-19 və əvəzedici heyətimizin demək olar, bütün oyunlarını stadiondan canlı izləyir, onların inkişafı, hansı formada olması barədə akademiyanın koordinatoru, məşqçiləri ilə fikir mübadiləsi aparır. Elə bunun məntiqi nəticəsi kimi əsas komandamızın bu qış Antalyada gerçəkləşən toplanışına U-19 komandamızın 4 üzvü cəlb edildi. Bunlar Nemət Musayev, Ceyhun Nuriyev, Abdulla Xaybulayev və Rüstəm Samiqullin idi. Bu futbolçular Türkiyədəki yoxlama oyunlarımızda da iştirak etdilər. Ceyhun Qazaxıstanın "Kaysar" və Moskva "Spartak"ının əvəzedici komandası ilə oyunlarda qol vurdu. Gələcəkdə də aşağı yaş qruplarında özünü göstərən uşaqların əsas komandaya cəlb edilməsi planlaşdırılır. Bundan əlavə, əvəzedici komandamızın üzvləri də mütəmadi olaraq əsas komandanın məşqlərinə cəlb edilir. Arsen Ağcabəyov, Elçin Mustafayev hətta rəsmi oyunlarda da əsas komandada çıxış etdilər".
Bu fikirləri təsdiq edən "Sabah"ın baş məşqçisi Jelko Sopiç sadəcə məsafənin uzaq olmasının gedib-gəlməyə problem yaratdığını dilə gətirib: "Bizim məşqçlərimiz şəhər kənarında olur. Məsələn, Masazırda. Bu da bizim üçün problem yaradır. U-21, U-19 komandaları ilə işləyirəm və uşaqlarla işləməkdən zövq alıram. Bu işimdir, mən isə işimi sevirəm. Sadəcə məşqlərin şəhər kənarında olması problem yaradır. Gedib gəlməyimiz üçün uzaqdır".
Digər klublarımızın da baş məşqçilərinin fikirlərini yaxın günlərdə diqqətinizə çatdıracağıq...
Röya Kərimli
Sport7.az
Комментарии
Отправить комментарий